बालेन शाहले आज सपथ लिँदै

आज देशको राजनीतिक परिदृश्यमा महत्वपूर्ण परिवर्तनको संकेत देखिएको छ। रामचन्द्र पौडेलले बालेन्द्र शाहलाई नयाँ प्रधानमन्त्रीका रूपमा शपथ गराउने तयारीसँगै सत्ता हस्तान्तरणको प्रक्रिया तीव्र बनेको छ। राष्ट्रपति कार्यालय शीतल निवासमा दिउँसो आयोजना हुने शपथग्रहण समारोहलाई विशेष महत्वका साथ हेरिएको छ।

संविधानको धारा ७६ (१) अनुसार एकल बहुमतको सरकार गठन हुन लागेको सन्दर्भमा यो कदमलाई स्थिर सरकारतर्फको संकेतका रूपमा व्याख्या गरिएको छ। राष्ट्रपति कार्यालयले प्रधानमन्त्रीसँगै मन्त्रिपरिषद् सदस्यहरूको पनि शपथ गराउने कार्यक्रम तय गरिसकेको छ, जसले नयाँ सरकारको तत्काल कार्यारम्भलाई सुनिश्चित गर्ने अपेक्षा गरिएको छ।

शपथग्रहण समारोहमा विभिन्न राजनीतिक दलका शीर्ष नेताहरू, कूटनीतिक नियोगका प्रतिनिधिहरू, नागरिक समाजका अगुवा तथा उच्च सरकारी अधिकारीहरूको उपस्थिति रहनेछ। यसले नयाँ नेतृत्वप्रति राष्ट्रिय तथा अन्तर्राष्ट्रिय चासो दुवै बढेको देखाउँछ।

गत फागुन २१ मा सम्पन्न प्रतिनिधिसभा निर्वाचनमा राष्ट्रिय स्वतन्त्र पार्टीले उल्लेखनीय सफलता हासिल गर्दै १८२ सिट जितेको थियो ।। सोही उपलब्धिलाई आधार बनाउँदै दलले बिहीबार मात्रै बालेन्द्र शाहलाई संसदीय दलको नेता चयन गरेको थियो। झापा–५ बाट ठूलो मतान्तरले विजयी भएका शाहको उदयलाई नयाँ पुस्ताको राजनीतिक हस्तक्षेपका रूपमा पनि व्याख्या गर्न थालिएको छ।

अब सबैको ध्यान नयाँ प्रधानमन्त्रीको प्राथमिकता, मन्त्रिपरिषद् गठन र सरकारको कार्यदिशातर्फ केन्द्रित भएको छ। नयाँ नेतृत्वले देशको राजनीतिक स्थिरता, सुशासन र विकासमा कस्तो प्रभाव पार्छ भन्ने प्रश्न यतिबेला मुख्य चासोको विषय बनेको छ।